[A:341]#/ /nyan chen bsod nams brtan pa'i rnam thar bzhugs/ /
/ /bskal par bsod nams ye shes tshogs/ /rab tu rdzogs mdzad gdul bya yi/ /rgyud dang rjes mthun phrin las dang / /ting 'dzin brtan pa la thob 'dud/ /bslab gsum rnam dag thos bsam mtha' ru phyin/ /rtse gcig bsgrubs pas go 'phang mchog brnyes te/ /gzhan don lhun grub rang don mthar phyin pa/ /bla ma'i yon tan mtha' dag bdag lta bus/ /bskal par brjod kyang mi nus de lta na'ang / /gzhan las thos dang bdag gis mthong tshod kyi/ /rgya mtsho che las chu thigs tsam zhig brjod/ /'dir bdag cag gi 'dren pa dam pa 'di sku 'khrungs sa la stod byang gi mdog gi sa char sku 'khrungs/ bcu bzhi pa man chad rten skya bo la bla ma chos rje sa skya paN chen dang mang du mjal/ dbu ma lugs kyi sems bskyed chen mo/ /snang ba mtha' yas kyi 'pho ba/ bsnyen gnas yang yang thob cing blang dor legs par mdzad/ lhag par thugs bskyed dang po nas 'byongs nas snying rje phan sems che/
bco lnga pa la rab tu byung nas bo dong rin po che'i drung du/ phar phyin/ rnam nges bsdus pa bslab/ grwa skor mdzad/ btsun rkang / ston pa bzang / bka' gyong / gcig tshugs 'dzin pa/ grwa pa la blo 'gro ba cig yod pa la/ bo dong rin po che de rten 'brel gyi khrid snying phu shug gseb pa la zhus pas/ mdze byung zin bzlog /nyam