[B:31a]las la sbyor ba dang bcas pa tha dad kyi skabs gzhan mtshan ma rnyed kyi bar mdzad pas/ yi dam chos skyong nor lha dang bcas pa rnams la mnga' brnyes pa yin te/ sems dpa' chen po mkhas chen nam mkha' chos bzang gis rje nyid kyis gur rigs bsdus kyi sgrub mchod mdzad dus dpal dgyes pa rdo rje'i rnam par gzigs pa'i nyams kyang byung / yang rdo rje phur pa'i sgrub mchod gnang dus/ rje btsun nyid rdo rje gzhon nu sku rgyan sogs longs sku'i rnam pa la na bza' rab byung gi chos gos bzhes par gdul bya las dag pa 'ga' zhig gis mthong ba'i snang ba shar/ spyir chos skyong gi bsnyen tshad rtags dang bcas pa lan gsum tsam gnang ba las/ gsum pa'i tshe dus gtor zhig gi dus su sngar bas zil che zhing zhabs 'bring pa rnams skyi g.ya' bar byung zhing / de'i srod kyi dus tsam na sgra chen [A:96]po dang / 'phral du spos gtong mkhan med kyang chos skyong gi spos sbyor gyi ngad chen po ldang ba dang / gzi byin shin tu che ba'i ngang nas/ rje 'di nyid kyi sku mdun gyi nam mkha' la gur gyi mgon po pad nyi ro'i gdan la sku mdog sngon po zhabs g.yas cung zad phyed dkrung gi tshul gyi rting pa la zhabs g.yon gyi brang gtad pa/ phyag gnyis gri thod steng 'og tu 'dzin pa/ dbu skra ser po gyen du langs pa la thod skam lnga'i dbu rgyan can/ stag lpags kyi sham thabs dang rin po che'i rgyan gyis brgyan pa/ sku g.yon du cung zad 'gying zhing me'i rgyab yol dang bcas pa 'jigs su rung ba blta bar mi bzod pa'i gzi byin can zhig mngon sum du gzigs pa las/
thugs bde ba dang dpa' ba'i nyams dang ldan bzhin pa'i ngang nas ji zhig na mi snang bar gyur pas/ de dag gi sku'i bkod pa 'phral du bri ba'i slad du zhabs 'bring ba rnams la ras gzhi zhig gi rtsol ba gyis bka' bstsal bas/ mtshan mo de ma thag ras gzhi