[A:༥༩བ]གྲགས་གྲགས་པའི་ཕྲེང་བས་ཀུན་ཁྱབ་ཁྱབ་བདག་དེ་ཡི་ཞབས།
།ཤུགས་དྲག་རྒྱུན་མི་འཆད་པའི་དད་པ་ཡིས།
།སྙིང་གི་པད་མའི་ལྟེ་བར་གུས་བསྟེན་པས།
།གསུང་རབ་དེ་ཉིད་མཐོང་བའི་རིགས་སྨྲ་དེས།
།རྨད་བྱུང་གཏམ་གྱི་སྦྱོར་བ་འདི་བྱས་སོ།
།ལེགས་བཤད་གཏེར་ཆེན་དེ་ཡི་གསུང་རབ་དོན།
།སྨྲ་བའི་ཁྱུ་མཆོག་ཀླུ་སྒྲུབ་ཐོགས་མེད་ཀྱིས།
།ཇི་བཞིན་བཀྲལ་བའི་ཚུལ་གཉིས་ཤིང་རྟའི་སྲོལ།
།དེ་བཞིན་འཆད་པའང་འདི་ལས་གཞན་ན་གང།
།རླབས་ཆེན་སྤྱོད་ལ་རིང་ནས་ཞུགས་པ་ཡི།
།རྒྱལ་སྲས་རིག་གནས་ཀུན་ལ་མཁས་པས་ཀྱང།
།ཤིན་ཏུ་དཔག་དཀའ་ཟབ་དང་རྒྱ་ཆེའི་གནས།
།ཇི་བཞིན་རྙེད་ནས་ཚུལ་བཞིན་འདྲིས་བྱས་པས།
།ཏིང་འཛིན་ཤེས་རབ་ཚུལ་ཁྲིམས་ཡོངས་དག་པའི།
།དགའ་སྟོན་ཆེན་པོས་ཡིད་རབ་ཚིམ་གྱུར་ནས།
།ངེས་འགའ་རྒྱལ་ལ་དད་པའི་དགའ་བ་རྒྱས།
།སྐབས་འགར་ཤིང་རྟ་ཆེན་པོའི་སྐུ་དྲིན་དྲན།
།གཞན་ཚེ་མཁས་པའི་བཤེས་ལ་གུས་པ་དང།
།ཉམས་ཆུང་འགྲོ་ལ་སྙིང་ནས་བརྩེ་བ་དང།
།བསྟན་པ་རིན་ཆེན་རིང་དུ་གནས་འདོད་པ།
།འདི་དག་ཕན་ཚུན་འགྲན་བཞིན་འཕེལ་བར་འགྱུར།
།དེ་ཚེ་རིང་ནས་ཉམས་པའི་རྟོགས་དཀའི་གནས།
།གང་གིས་བཙལ་བས་རྙེད་པའི་རིགས་པའི་ལམ།
དེ་ཡི་རྣམ་འཕྲུལ་ཀྱེ་མའོ་ངོ་མཚར་ཞེས།
།གཅིག་པུར་གནས་ཀྱང་དགའ་བའི་ཅ་ཅོ་འཆོར།
།དེ་འདྲ་དེ་ལ་སྨྲ་བའི་ཟླ་བ་ཡིས།
།འདི་ནི་ཤེས་རབ་མཆོག་གི་བསམ་གཏན་པ།
།ཚུལ་ཁྲིམས་དག་པའི་མགོ་ལ་འདུག་པ་པོ།
།རྒྱལ་བའི་གདུང་འཚོབ་ངེས་དོན་རྙེད་པ་ཞེས།
།བསྟོད་པའི་ཕྲེང་བས་ཡང་དང་ཡང་དུ་བསྔགས།
།དེ་ལྟར་རྒྱལ་བས་བསྔགས་པ་གང་གིས་འདོད།
།བློ་ལྡན་དེ་ཡིས་རྣམ་བཤད་འདིར་ཞུགས་ནས།
།བློ་མིག་རིགས་པའི་ལམ་གྱིས་དག་པར་གྱིས།
།ཚུལ་གཉིས་ཤིང་རྟའི་སྲོལ་འབྱེད་འདིར་འབད་པས།
།བདག་གིས་བསོད་ནམས་གང་ཞིག་བསགས་པ་དེས།
།ཀླུ་སྒྲུབ་ཐོགས་མེད་ཇི་བཞིན་རྒྱལ་བ་ཡི།
།དམ་ཆོས་མཐའ་དག་ཡུན་རིང་འཛིན་པར་ཤོག།
།ཚུལ་དེས་རྒྱལ་བ་དགྱེས་པ་སྐྱེད་པ་ལ།
།རྒྱལ་སྲས་མཁས་པ་ཀུན་བཟང་འཇམ་དབྱངས་ཀྱིས།
།ཇི་ལྟར་སྤྱད་པ་དེ་ལྟར་བདག་གིས་ཀྱང།
།རླབས་ཆེན་སྤྱོད་ལ་ཀུན་ནས་སྤྱོད་པར་ཤོག།
།ཅེས་མགོན་པོ་ཀླུ་སྒྲུབ་ཀྱིས་ངོ་བོ་ཉྀད་མེད་པའི་ཚུལ་དང། བདག་ཉིད་ཆེན་པོ་ཐོགས་མེད་ཀྱིས་རྣམ་པར་རིག་པ་ཙམ་གྱི་ཚུལ་གྱི་ཤིང་རྟ་ཆེན་པོའི་སྲོལ་གཉིས་ཕྱེ་ནས། གསུང་རབ་ཀྱི་དྲང་བ་དང་ངེས་པའི་དོན་རྣམ་པར་ཕྱེ་བ་གསལ་བར་བྱེད་པ་ལེགས་པར་བཤད་པའི་སྙིང་པོ་ཞེས་བྱ་བ་འདི་དགེ་སློང་མང་དུ་ཐོས་པ་རིགས་པ་སྨྲ་བ་ཤར་ཙོང་ཁ་བ་བློ་བཟང་གྲགས་པའི་དཔལ་གྱིས་སྦྱར་བའི། ཡི་གེ་པ་ནི་དགེ་སྦྱོང་སྡོམ་བརྩོན་བསོད་ནམས་བློ་གྲོས་སོ།
།འདིས་ཀྱང་བསྟན་པ་རིན་པོ་ཆེ་ཕྱོགས་ཀུན་ཏུ་རྒྱས་པར་བྱེད་ནུས་པར་གྱུར་ཅིག།།
Carving Colophon, ff. 59b7-60b7
༑ །།ན་མོ་མཉྫུ་ཤྲི།
ཚོགས་གཉིས་རྒྱ་མཚོའི་དཔལ་ལས་འཁྲུངས་པའི་སྐུ་གསུམ་ལྷུན་པོ་རིན་ཆེན་འཛིན།
།ནམ་མཁའི་མཐར་ཐུག་རྫུ