[A:༤༨༦]རྗེས་གནང༌། གཞན་ལས་ཆེས་ཟབ་པ་རྩ་བའི་མན་ངག་གཉིས། རྣམ་པར་དབྱེ་བ་བཅུ་གཉིས། ཡན་ལག་གི་མན་ངག་བཅུ་དྲུག །ཆོ་གའི་ལག་ལེན་ཉི་ཤུ། དེ་དག་གི་ཡིག་ཆའི་གཙོ་བོ་མང་པོའི་ལུང་སོགས་ས་སྐྱ་རྫོང་ཆུང་པར་གྲགས་པའི་མན་ངག་མཐའ་དག་གི་ཟབ་ཆོས་མང་པོ་གསན་ཅིང༌། བླ་མ་འདི་དག་གིས་གཙོ་བྱས་གུར་གྱི་མགོན་པོའི་སྐོར་ཁོ་ན་ལ་བླ་མ་བཅུ་བསྟེན་ལུགས་སྲོལ་མ་འདྲེས་པ་ཡོངས་སུ་རྫོགས་པར་གསན་པ། ཇི་སྐད་དུ། ཁྱད་པར་ནག་པོ་ཆེན་པོའི་མན་ངག་ནི། །བརྒྱུད་ལྡན་བླ་མ་བཅུ་ཕྲག་གཅིག་ལ་ཞུས། །འགྲན་ཟླ་ཀུན་བྲལ་དྲིན་ཅན་རྡོ་རིང་པའི། །སྙན་བརྒྱུད་ཟབ་མོ་བུམ་པ་གང་བྱོར་ཐོབ། །ཅེས་དང༌། ཨེ་ཝཾ་པ་ནི་བསྡུས་ལ་སྤྲོས་པ་ཆུང༌། །མུས་སྲད་པ་ནི་དཀར་ཆག་ཁྲིམས་ཆགས་ཅན། །རྡོ་རྗེ་གདན་པ་འཆམ་དང་ནུས་པའི་བདག །ཁོ་བོས་ཐོབ་པའི་ཐུན་མོང་བརྒྱུད་པ་གསུམ། །ཞེས་བྱུང་ལ། གནོད་སྦྱིན་བེག་ཙེ་ལྕམ་དྲལ་གྱི་རྗེས་གནང་ལུང་མན་ངག་རྣམས་གསན། གཞན་ཡང་སྔ་ཕྱི་བསྡོམས་པར་བླ་མ་བསྟེན་པའི་སྐོར་ལ་ལོ་ཟླའི་དུས་ངེས་ཅན་མ་རྙེད་པས་ཕྱོགས་མཚུངས་སུ་བཀོད་པར། དྭགས་པོ་པཎ་ཆེན་ཕྱོགས་ལས་རྣམ་རྒྱལ་ལམ་རྗེ་བཙུན་འཕྲིན་ལས་ཞབས་ལ་སྒྲོལ་དཀར་ཡིད་བཞིན་འཁོར་ལོ་སོགས་ཀུན་མཁྱེན་བཀྲ་ཤིས་རྣམ་རྒྱལ་ནས་བརྒྱུད་པའི་ཟབ་ཆོས་དུ་མ་དང་ཀར་ལུགས་སོགས་ཀྱི་ཆོས་བཀའ་ཁ་ཡར།