[A:46]zhes bya ba'i lhums su ngo mtshar ba'i brjod pa du ma dang bcas nas bltams shing sku gzhon nu nas rab tu byon/ thos pa'i bya ba mthar phyin/ da lta gsang phu'i bdag cag gi grwa tshang gi slob dpon yang mdzad yod do//
zhes pa'i rdzun med pa'i gtam bsnyad pas/ yum de nyid skom pas bdud rtsi'i btung ba thob pa ltar tshim pa'i mchog rnyed cing/ da ni zhal gyis 'ches pa ltar bod yul rdo rje gdan chos 'khor lha sa'i jo bo'i drung du mjal nges/ zhes sems shing don de nyid ngag nas smreng bzhin du/ sngon dus kyi ja bzang po sigs bcu gnyis tsam gyi sgal ma dang/ yum de nyid sku na tshod bgres pas bskyod bde ba'i ched mdzo'i chibs/ drel dang bcas lha sar gtad nas byon pa la/ gang gi thugs rje'i mthu dang/ sngon gyi smon lam gyis nye zho'i ming tsam yang med par/ thog mar se ra'i chos grwar phebs nas jo mjal la byon pa dang bskor lam du mjal bas/ de ma thag bdag nyid chen po slob ma'i tshogs/ blo gros kyi padmo rgyas shing ngur smrig gi mdangs gsal ba'i dge ba'i bshes gnyen brgya phrag tsam gyis mdun bdar te byon pa'i sku'i dkyil 'khor mtshan dpes spras pa gang gi mig lam du gyur pa'i skad cig de nyid las thob pa'i dga' ba tsam gyis yid yongs su brgyan bzhin du gus pas phyag bgyi ba dang lhan cig/ bdag gi bu skyes bu chen po 'di lta bu'i sku'i skye ba yongs su bzung yong sems pa da ni mngon sum du mthong ngo zhes/ gang gi yan lag mchog gis zhabs kyi padmo la yongs su btud de 'khod ces der 'dus pa'i dge 'dun ma lus pa rjes su sgrog go//
de nub dad pa can de'i mos dungs kyi lcags kyus rab tu zhi zhing dul ba'i yongs rdzogs bstan pa'i khur 'chang ba'i glang po'i mchog gang de se ra'i rang 'dug pa'i