R1: chos kyi rje thams cad mkhyen pa rdo rje gdan pa chen po kun dga' rnam rgyal dpal bzang po'i rnam par thar pa ngo mtshar rin po che'i gter mdzod/ {bod yig glog rdul dpe cha/}
[B:30b]mgon zhal bzhi pas rjes su gzung bar grags so/ /yang rje byams pa gling pa'i drung du phyag rdor u tsa rya'i rjes gnang zhus shing sgrub thabs kyi thugs rtsom yang zhus nas/ sku na phra mo yin kyang thugs brling ba dang thugs dam bsnyen sgrub la brtson par mdzad pa dang / bstan pa rin po che'i sgor 'jug pa la thugs shin tu brnags par byung dus/ mnal lam du thams cad mkhyen pa byams pa gling pa byon te logs shig la phyag rdor gyi sku zhig 'dug pa bstan nas/ "'di'i sku'i thad sor bskyed bsrings pa na bu khyod kyi 'dod pa 'grub bo "gsung ba'i lung bstan gsal [A:94]por byung ba dang / phyisgong dkar du phebs dus gzims chung bar zhes pa na logs bris la phyag rdor gyi sku byin rlabs can zhig bzhugs pa la gus pa drag tu mdzad cing / sngar gyi mnal lam dran te/ phal cher sku 'di'i zhabs kyi thad sor yan lag dang pos reg pa na bstan pa'i sgor zhugs chog par nges snyam du sku bskyed la thugs 'dun drag por mdzad de gsol ba btab pas/ slar rab tu byung ba sgrub pa dang / de'i sku'i thad du sku bskyed bsrings pa mnyam du byung bas/ sngar gyi lung bstan la nges pa thob cing bris sku la yang bsngags par mdzad do/ /
yang srid kyi tshul ma spangs pa'i skabs su yang / gong dkar la skyid gtsang 'dres pa'i chu bo'i gnod pa gtad tshugs su byung ba na/ yi dam rdo rje phur pa'i sgo nas de'i thad du thugs dam bsnyen phur btsugs nas bka' bsgos shing / de'i phyi la mchod rten brtsigs pa na/ ji ltar bsgo ba bzhin du chu'i gnod pa phyir bzlog pas rnal 'byor dbang phyug bir wa pa dang mtshungs pa nyid na/ sangs rgyas kyi bstan pa spyi dang khyad par gyi don du bsams bzhin skye ba bzhes pa zhig go/ zhes kun gyis [A:95]bkur zhing rje btsun brag thog pa chen pos kyang / de dus mtshan 'jigs med dpa' bo zhes par mnga' gsol nas/ de dang mthun par phur pa'i rig 'dzin bskul ba'i skabs su bstod bsngags mdzad do/ /
phyis yi dam chos skyong so so la bsnyen zhing sgrub pa