[A:115a]btsun mo blon 'bangs nor/ bzhon pa/ sa cha'i ming bris nas bum par bcug ste/ khye'u de'i rtsar bsnams nas/ de la khyod bum pa 'di'i nang du kha chug la yul 'di'i rgyal po nga byed pa yin no bya ba lan gsum du gyis shig gsung / de bzhin byas pas bum pa bzang po de'i mthus/ yul de'i rgyal po yul gzhan du 'gro 'dod nas gsang ste dmangs kyi tshul du byas nas song / de'i shul du yul de na ltas ston pa'i glang po che nyi ma'i shugs can bya ba yod la/ des dmag 'ong na sa 'thor/ yul du nad la sogs pa 'byung na zas mi za zhing mchi ma 'byin/ bkra shis pa la snas skyed tshal nas me tog blangs te 'thor/ rgyal por su bkod ran pa na des snar rgyal po dbang bskur ba'i bum pa thogs te gang gi spyi bor 'jog pa yin pas/ de'i tshe rgyal po'i pho brang nas bum pa blangs te byis pa dag rtse ba'i nags tshal gyi phyogs der song ngo / /'khor rnams ha las te/ yang na rgyal po 'di 'chi'am/ yang na rgyal sa 'chor/ su zhig rgyal por 'gyur snyam/ der de'i phyi bzhin 'brangs so/ /glang po ches bum pa de byis pa de'i mgo bor bzhag go /de nas de blon po la sogs pa thams cad kyis bsus te pho brang du rin po che'i khri la bzhag nas rgyal por dbang bskur ro/ /der nang mi dag gis mi 'khur/ de'i dbang gis phyi'i yul 'khor ba rnams 'di rA dza bcos ma ste nang mis mi 'khur bas so snyam thams cad bka' la mi 'khri'o/ /der slob dpon la gsol ba btab pas/ bum pa bzang po bsnams nas byon/ khyod 'jigs mi dgos kyi glang po che la zhon phub ral thogs te 'khor dang bcas pa skyed mos tshal du song la/ der ljon shing la thal lcag rgyob la prikSha dmag la song zhig smros shig des 'dul bar 'gyur ro/ /de ltar byas pas sdong po thams cad dmag tu gyur nas zhub can gyis skyed tshal gang ba mthong ba dang / 'bangs thams cad kyis bsod nams chen por shes nas mchog tu gus pas rgyal srid shin tu yun ring bar bskyangs/ nam zhig yul der stag gzig pa thang khengs pa byung bas thams cad kyis tshong pa'o snyam pa na/ de rnams kyis rta dang glang po'i rgyab nas snod kha phye ste/ khrab dang mtshon cha'i rigs phyung / go sprad de g.yul brtsams pas thams cad skrag pa na/ rgyal pos ma