[A:304a]rgyal po ste/ shangs su 'khrungs/ yab la rab tu byung / dgung lo nyer lnga pa la gdan sar bzhugs/ hor rgyal po thu'o hun the'i mur gyis bla'i mchod gnas su bzung / gtsug lag khang gong 'og la thig blangs pa'i bla re padma 'bum ldan dang stong lnga/ hor dud stong dgu brgya mnga' 'bangs su sbyar ba'i 'ja' sa phul/ gdan sa shin tu dar/ dgung lo so brgyad la gshegs/ /de'i sras chos rje kun dga' sengge ste/ gzhung du 'khrungs/ rgyud du ma 'grel pa dang bcas pa thugs su chud cing rnam dpyod gzhan bas gtsang bas 'jam dbyangs kun dga' sengge zhes zer/ hor rgyal po ye sun tha mur dang / the mur sbo kha'i 'bul skyel a ga ru nag po 'ba' zhig la rin po che'i phra sna tshogs btab pa'i lcog rtse sogs gtos che/ yab sras de gnyis kyis gsung rab phal cher gos shog la gser du bzhengs/ glegs thag la sogs pa'ang si ta'u la byas so// de la slob ma mkhan po rdo rje rin chen dang / bla chen bsam rgyal kha che ba zhes bon nus pa can chos lugs su 'gyur ba de gnyis gtso bo/ gzhan lha khab 'jig rten blos btang sogs mang ngo / /dgung lo so bzhi la gshegs/ 'di chos rje'i sprul par grags// de'i sras blo gros sengge lhor 'khrungs/ yab gshegs pa sngas/ yab tshan ring por 'gro ba'i dbon po kun dga' sengge zer ba zhig gis gdan sa thob re ba'i 'phung stobs kyis gdan sa la skyon che bar byung / mchod gzhis phal cher de dus shor/ chos rje rang mkhan po dang bla chen pas gdan sar spyan drangs nas chos kyi 'phrin las che bar byung / slob ma jo nang phyogs pa'i zhal slob mkhyen brtse rtogs ldan nam sngo nyal ma/ dus 'khor la mkhas shing nyams mthar phyin pa zhig zhabs la gtugs pas rtogs pa'i ye shes 'khrungs/ sku lus ma spangs par gangs bzang gi mchod gnas su bzhugs pa yin/ de la zhal slob grub chen blo gros mchog ldan dkon mchog bsam grub dang / mkhas grub legs pa rin chen zer ba gsum byung ngo / /chos rje de rang dgung lo zhe drug pa la gshegs/ yab nyid kyi sprul pa yin zer/ de la sras gnyis byung ba'i shes rab sengge ni/ gdan sar snga mo nas byon te dgung lo nyi shu rtsa gnyis pa la gshegs/ 'di yan gyis sengge dgu tshar rdzogs/ sras gcig shos ye shes