[A:3]gnas dang gnas ma yin 'di zhes//
phra rgyas spu ris so sor phye//
gser dang ra gan 'dres pa lta'i//
tshig don ldib po ji snyed dag//
yongs dpyod rnam dpyod nor bu yis//
dman pa bsal nas mchog sbyin mdzad//
'khor ba'i rgya mtsho las brgal te//
thams cad mkhyen grong nyams dga' bar//
bslab gsum gru gzings ma bcas par//
snying stobs rkyal gyis ji ltar phyin//
'khor ba ma rig mun stug 'phrang//
mang thos sgron me lag thogs nas//
ngan 'gro'i g.yang la rab bzur te//
thar pa'i lam la rjes 'gro nyid//
gang yang dad pa'i rjes zhugs yid la tshig 'bru thos pas tshim pa ster//
gang dag chos kyi rjes 'brang blo can don bzang gtan tshigs mgu bskyed de//
gang zhig yon tan rgyan phreng la dga' mkhas mang yid kyi 'dod 'jo ba//
gang gi blo gros yi ger 'phos 'dras nang gi de nyid mtshon par byas//
gting mtha' mi mngon rnam thar chu gter las//
nye bar drangs pa'i legs bshad dal 'gro'i rgyun//
rab brjid snyan ngag rba klong g.yo ba can//
mdo rgyud chu klung kun 'du'i rgya mtsho la//
dam chos yid bzhin nor bu'i bang mdzod can//
lung rigs rnyog med gdeng kas mngon par mdzes//
stong nyid snyems pa'i phuT sgra'i sgra sgrog pa//
paN grub klu dbang de la snying nas dad//
khyod thugs dpal gyi be'u las son pa'i//
rang rig rang gsal chos dbyings gdod ma'i dbyings//
'od gsal snang ba'i sgron me nor bu'i tog//
nyams len sgrub pa'i rgyal mtshan gtsug na mtho//