[B:29b]gi bla ma rnal 'byor gyi dbang phyug [A:90]chen po de/ thams cad mkhyen pa'i go 'phang mngon du mdzodmdzad bzhin du yang gdul bya rnams/
tshul gnas thos dang bsam ldan pas/ /
sgom pa la ni rab tu sbyor/ /
chos mngon pa mdzod/
zhes gsungs pa ltar/ dang po gzhi tshul khrims rnam par dag pa la gnas/ bar du rig pa'i gnas lnga sogs/ shes bya shes byed mtha' yas la thos bsam gyis sgro 'dogs bcad/ tha mar ting nge 'dzin dang shes rab kyi bslab pa'i sgo nas thos pa'i don sgrub pa snying por byed par lhur len dgos par shes pa'i ched du/ mgon po 'dis kyang dang po gnyis mdzad tshul gong du bshad zin/ tha ma sgrub pa snying por mdzad pa'i tshul ni/
lam thun mong ba pha rol tu phyin pa dang sgo bstun nas bsam pa theg chen sems bskyed/ spyod pa phar phyin drug ldan/ lta ba stong nyid rtogs pa'i shes rab zung 'brel du thugs nyams bzhes/
lam thun mong ma yin pa rgyud sde rgya mtsho'i nges gsang smin byed kyi dbang las/ dga' bzhi'i chu bos 'khor lo drug gis bsdus pa'i sku'i gnas so sor yongs su gang ste/ snang grags kyi chos thams cad dag pa rab 'byams kyi ngang du shar ba'i rim pa dang po dang / yul dang [A:91]yul can gnyis su med par zag med bde ba'i ye shes gcig gi ngang du zung 'jug rnam pa bzhi'i sgo nas/ rten dkyil 'khor bzhi las sku bzhi'i 'bras bu mngon du 'gyur ba'i tshul rim pa gnyis pa sogs rnal 'byor bcu'i rim pa las mi g.yo bas/ ji lta ji snyed kyi chos thams cad thugs dam gyi klong du gyur nas chos min gyi skabs mi srid pa'i ting nge 'dzin dang / shes rab kyi bslab pa la nan tan snying por mdzad pas/ gzhi gnyug ma rang bzhin lhan skyes/ de nyid lam bskyed rdzogs kyi zhu bde lhan skyes/ 'bras bu rang rig pa'i zag med bde chen gyi ye shes phyag rgya chen po mchog gi go 'phang mngon du mdzad pa'o/ /
smras pa/
rang bzhin spros bral 'phel 'grib dang bral yang / /
gzhan snang sgyu 'phrul cha shas rim pa bzhin/ /
yongs rdzogs phan bde'i bsil zer 'phro ba can/ /
'gro mang rgyu skar dbus na rnam par mdzes/ /