[A:232]ལྗེན་པ་ཅན༎
སྨྲ་བ་པོ་གང་བླུན་པོ་ལས་འདས་མོད༎
ཡི་གེའི་སྣང་བ་སྤྲོ་བྱེད་རྨོངས་པ་བདག༎
ནམ་ཡང་རང་ཉམས་མཁས་པའི་ཁེངས་པ་བྲལ༎
ཅུང་ཟད་ལས་དཀར་དག་པས་ཡིད་བསྐུལ་ནས༎
ཆོས་ཕྱིར་དཀའ་བའི་ཁུར་བསྐྱེད་ཕྱོགས་མཐའ་ཉུལ༎
རྙེད་གྲགས་ཁྱད་གསད་ཁྱོད་ཞབས་བསྟེན་པའི་བཤེས༎
གང་དག་ཞལ་སྒོར་དབང་ལུང་གདམས་པ་ནོད༎
ཕྱོགས་མེད་ཕྱོགས་བྲལ་ཕྱོགས་འཛིན་བཏང་བའི་བློ༎
ཕྱོགས་མཐོང་ཕྱོགས་གཅིག་སྨྲ་བའི་ཕྱོགས་བྱོལ་ནས༎
ཕྱོགས་བཅུ་ཕྱོགས་ཀྱི་བཤེས་གཉེན་ཕྱོགས་གཏོགས་ལ༎
ཕྱོགས་ཙམ་ཕྱོགས་མཚུངས་ཕྱོགས་ལས་རྣམ་པར་རྒྱལ༎
ཁྱོད་ཀྱི་གསུང་གི་ཟེགས་མ་ཕྲ་མོ་ཡང༎
ཁྱོད་ལ་རྗེས་བསམས་འབད་པས་ལེགས་བཙལ་ཏེ༎
ཁྱོད་ཀྱི་རྗེས་སློབ་ཡོངས་ལ་ཕན་བསྐྱེད་ཕྱིར༎
ཁྱོད་ཀྱི་བསྟན་པའི་ཁུར་ཆེན་སྙིང་ནས་བླངས༎
ཀྱེ་མ་སྙིགས་མའི་དབང་གྱུར་པས༎
རང་བློས་གཞལ་ནས་ཀླན་ཀ་སྒྲོག།
ཕྱོགས་འཛིན་རབ་རིབ་མིག་ལྡོངས་པས༎
ཇི་བཞིན་མཐོང་བའི་ཡུལ་མ་གྱུར༎
འདི་ན་གྱ་ཚོམ་སྤྱོད་པའི་འགྲོས་ཅན་འཇིག་རྟེན་ལས་སྣང་མཆོར་ཆས་མཁན༎
ཆོས་ལྟར་བཅོས་པའི་ཚུལ་གྱིས་རབ་དྲེགས་ཚིགས་སྒྲས་བསྟན་པ་འཛིན་བརྩོན་ཞིང༎
བསླབ་གསུམ་རྒྱན་གྱིས་ཆོག་པར་མི་འཛིན་འབད་པའི་ལས་རོ་བ༎
བསྟན་པའི་མིག་རྐྱེན་དམན་པར་གྱུར་གང་སྙིང་ནས་སྙིང་རྗེའི་ཡུལ་ཉིད་ལགས༎
ཤཱཀྱའི་བསྟན་འཛིན་མཆོག་འདིའི་དགོངས་པའི་དབྱིངས༎
ཚུལ་ལྡན་མང་ཐོས་སྤོང་བ་ལྷུར་ལེན་པ༎
རབ་དུལ་ཞི་ཞིང་གསོང་པོར་སྨྲ་བ་ཅན༎
ཆོས་བརྒྱད་བྲལ་གང་ཁྱོད་ཀྱི་རྗེས་སློབ་ཡིན༎
ཡོངས་རྫོགས་བསྟན་པའི་གཞུང་ལུགས་མ་ལུས་པ༎
གཟིགས་པ་རྒྱ་ཆེན་རང་གཞན་མ་འདྲེས་ཕྱེད༎
ལུང་རིགས་དག་པའི་སྒྲོན་མ་འཛིན་པ་ཅན༎