[A:52]ལྷ་དགུའི་དབང་བསྐུར་ཅིག་གསན་ཞིང། བཀའ་ལས། རང་རེ་ཚེ་མཐར་ཕྱིན་པ་འདི། སྤྱང་ལུང་རིན་པོ་ཆེ་པ་ལ་བཀའ་འབྲེལ་ཐོག་མ་ཚེ་དཔག་མེད་ཀྱི་དབང་ཐོབ་པའི་རྟེན་འབྲེལ་ཡིན་ཞེས་དང། ངེད་ཀྱི་ཚེ་དཔག་མེད་འདི་རྗེ་བཙུན་གོང་མ་ལྔ་པོ་ནས་བླ་མ་བདག་ཉིད་ཆེན་པོ། ཆོས་རྗེ་བླ་མ་དམ་པ་ཐེག་ཆེན་ཆོས་ཀྱི་རྒྱལ་པོ། དེ་ལ་སྤྱང་ལུང་རིན་པོ་ཆེ་པས་གསན། མི་བར་ཁྱི་མ་ཞུགས་པའི་བརྒྱུད་པ་ཡིན་གསུང་བ་དང། བླ་མ་བདག་ཉིད་ཆེན་པོ་བཟང་པོ་དཔལ་བས་དགུང་ལོ་བཅུ་དགུ་བཞེས་པའི་སྟེངས་སུ། འགྲོ་མགོན་ཆོས་རྒྱལ་འཕགས་པ་ལ་ཚེ་དབང་ཀྱཻ་རྡོར། མགོན་པོ་ལྕམ་དྲལ་གསན་ཟེར་བ་འདུག་གོ་ཞེས་ཀྱང་ཡང་ཡང་དུ་གསུང་ངོ༎
དེར་བྱང་སེམས་བདེ་མོ་ཐང་པས་ཞུ་བ་པོ་མཛད་ནས་བློ་སྦྱོང་རིགས་མི་འདྲ་བ་དྲུག་ཅུ་ཙམ་དང། ཁྲོ་ཕུ་བའི་ཆོས་སྐོར་རྒྱས་པ། སྙིང་པོ་དོན་གསུམ། རེད་མདའ་པའི་དབུ་མ་ལྟ་ཁྲིད་རྣམས་ཐོབ། བློ་སྦྱོང་རྣམས་སྤྱང་ལུང་རིན་པོ་ཆེས་བྱང་སེམས་རྭ་སྒྲེང་བར་གྲགས་པ། མཚན་དངོས་ཤཱཀྱ་བསོད་ནམས་ཐེར་བ་རྒྱལ་སྲས་ཆོས་རྫོང་པའི་དངོས་སློབ་དེ་ལ་གསན་པར་འདུག། བརྒྱུད་ཐག་ཤིན་ཏུ་ཉེ། རྒྱལ་སྲས་བཀའ་འབུམ་ནང་ན་ཡོད་པའི་བཀའ་ཤོག་གནང་བའི་ཤཱཀྱ་བསོད་ནམས་དེ་ཀ་ཡིན་ཞེས། བདག་གི་བླ་མ་རྗེ་བཙུན་ཀུན་དགའ་མཆོག་གྲུབ་པས་བློ་སྦྱོང་མ་ལུས་པ་གསན་དུས་པཎ་ཆེན་རིན་པོ་ཆེས་བཀའ་ལུང་བྱོན་པའི་གསུང་སྒྲོས་མ་ཉམས་པ་ཡིན། དེ་མཚམས་མཁར་རྩེ་བས་ཀྱང་ཟླ་ཕྱོགས་བཟང་བ་ཞིག་ཕུལ་རིང་ལ། ཕྱིས་གླིང་སྨད་གདན་ས་པར་གྲགས་པའི་ཆོས་རྗེ་ཤེས་རབ་དཔལ་ལྡན་པས་ཞུ་བ་པོ་མཛད་ནས། དུས་ཀྱི་འཁོར་ལོའི་མཆོག་དབང་སྔོན་དུ་འགྲོ་བའི་སྦྱོར་བ་ཡན་ལག་དྲུག་པའི་ཁྲིད་གནང་བའི་སྔོན་འགྲོའི་སྐབས། བསྡུས་རྒྱུད་བཟུང་ཞིང་ས་རིས་ཀྱང་དུས་དེར་སྤྱང་ལུང་རིན་པོ་ཆེ་ཉིད་ཀྱིས་བསྩལ། དེར་དུས་ཞབས་སྙན་བརྒྱུད། ཡེ་ཤེས་སྤྱན་བསྒྲུབ།