[A:52]lha dgu'i dbang bskur cig gsan zhing/ bka' las/ rang re tshe mthar phyin pa 'di/ spyang lung rin po che pa la bka' 'brel thog ma tshe dpag med kyi dbang thob pa'i rten 'brel yin zhes dang/ nged kyi tshe dpag med 'di rje btsun gong ma lnga po nas bla ma bdag nyid chen po/ chos rje bla ma dam pa theg chen chos kyi rgyal po/ de la spyang lung rin po che pas gsan/ mi bar khyi ma zhugs pa'i brgyud pa yin gsung ba dang/ bla ma bdag nyid chen po bzang po dpal bas dgung lo bcu dgu bzhes pa'i stengs su/ 'gro mgon chos rgyal 'phags pa la tshe dbang kyai rdor/ mgon po lcam dral gsan zer ba 'dug go zhes kyang yang yang du gsung ngo//
der byang sems bde mo thang pas zhu ba po mdzad nas blo sbyong rigs mi 'dra ba drug cu tsam dang/ khro phu ba'i chos skor rgyas pa/ snying po don gsum/ red mda' pa'i dbu ma lta khrid rnams thob/ blo sbyong rnams spyang lung rin po ches byang sems rwa sgreng bar grags pa/ mtshan dngos shAkya bsod nams ther ba rgyal sras chos rdzong pa'i dngos slob de la gsan par 'dug/ brgyud thag shin tu nye/ rgyal sras bka' 'bum nang na yod pa'i bka' shog gnang ba'i shAkya bsod nams de ka yin zhes/ bdag gi bla ma rje btsun kun dga' mchog grub pas blo sbyong ma lus pa gsan dus paN chen rin po ches bka' lung byon pa'i gsung sgros ma nyams pa yin/ de mtshams mkhar rtse bas kyang zla phyogs bzang ba zhig phul ring la/ phyis gling smad gdan sa par grags pa'i chos rje shes rab dpal ldan pas zhu ba po mdzad nas/ dus kyi 'khor lo'i mchog dbang sngon du 'gro ba'i sbyor ba yan lag drug pa'i khrid gnang ba'i sngon 'gro'i skabs/ bsdus rgyud bzung zhing sa ris kyang dus der spyang lung rin po che nyid kyis bstsal/ der dus zhabs snyan brgyud/ ye shes spyan bsgrub/