[A:48]ཡུམ་བཞུགས་པའི་ཕྱོགས་དེར་ཀརྨ་པའི་ཆོས་བརྒྱུད་ལྷག་པར་དར་བ་ཡོད་པས། དེའི་ཆེད་དུ་མཚུར་ཕུར། མཚུར་ཕུ་འཇམ་དབྱངས་དོན་གྲུབ་འོད་ཟེར་བའི་དྲུང་དུ་གཏད་ཕེབས་པས། ཁོང་པ་ལྷ་བསྙེན་ཁག་ཆེ་བ་ཞིག་གི་སྐུ་མཚམས་སྒང་དང་ཐུག་ཚུལ་ཕུལ་བས། ཁྱེད་ལྟ་བུའི་བསྟན་འཛིན་སྐྱེས་བུ་ལ་ཆོས་འབུལ་བ་དང་སྤྲོ་ཡང། རྒན་པོ་འཆི་ལྟས་ཞིག་གིས་གཙེས་པས་ཚེ་བསྙེན་ཞིག་ལ་ཡོད་ནའང། ལྟས་ལེགས་པ་མ་བྱུང་བས་འགུམ་པ་ལ་ཕྱོགས་འདུག་པ་མཚམས་བསེངས་པའི་བརྗོད་འདོགས་སྲིད་པས། ད་འདི་ནས་ཀྱི་བརྡའ་སྦྱོར་ཡི་གེ་འདི་དང་བཅས་གནས་ནང་དུ་སློབ་དཔོན་གྲགས་པ་འོད་ཟེར་བའི་དྲུང་དུ་བྱོན་ན་འཐད་ཅེས་པའི་བསླབ་སྟོན་ལྟར་ཕྱིན། དེར་ནག་རྒྱ་ཕག་གསུམ་དང་མཁའ་འགྲོ་རྒྱ་མཚོ་སོགས་ཀརྨ་པའི་ལུགས་ཀྱི་དབང་ལུང་མང་བ་དང། ནང་བརྟག་རྒྱུད་གསུམ་སོགས་བཤད་ཚོམ་ཀྱང་མང་དག་ཐོབ། གར་ཐིག་དབྱངས་སོགས་ཀྱི་ཕྱག་བཞེས་ཀྱང་ཡང་དག་པར་སྩལ་ནས། ཕར་ལམ་ནམ་མཁའ་ཁྱུང་རྫོང་ལ་བྱས་ཀམ་དགོན་དུ་ཕྱིན་དེར་ཐེག་ཆེན་ཆོས་རྗེའི་བུ་ཆེན་བློ་གྲོས་ཆོས་སྐྱོང་བའི་སྤྱན་སྔར་འཇིགས་བྱེད་རྭ་ལུགས་སྐོར་གྱི་དབང་རྒྱུད་མན་ངག། གུར་བརྟག་སཾ་གསུམ་གྱི་བཤད་པ་ཐེག་ཆེན་ཆོས་རྒྱལ་ལས་བརྒྱུད་པ་དང། ལཱུ་ནག་དྲིལ་གསུམ་གྱི་དབང་ཡང་ཐེག་ཆེན་པ་ཉིད་ལས་བརྒྱུད་པ། གཞན་ཡང་ཐེག་ཆེན་པའི་ལུགས་ཀྱི་གཤེད་དམར་སོགས་དབང་བསྐུར་མང་རབ་དང། གུར་གར། དཔལ་ལྡན་བླ་མ་དམ་པའི་དངོས་སློབ་ཤེས་རབ་སྣང་བའི་ཕྱག་བཞེས། རྗེ་ཀམ་དགོན་པས་ཤེས་རབ་སྣང་བ་ཉིད་ལས་ནོད་པ་ལྟར་སྩལ། དེར་གུར་གར་ལ་སཾ་སྐྼ་ཏའི་སྐད་མང་དུ་དགོས་པ་དང། སྐབས་འགར་དུར་ཁྲོད་ཀྱི་གར་སོགས་ལ་པྲ་ཀྼ་ཏའི་སྐད་དགོས་པ་རྣམས་སོ་སོར་ཕྱེ་བས་དགེས་ནས་པཎྜི་ཏ་ཞེས་ཡང་ཡང་གསུངས་པས།